Gudiya se khelna chhor diya

Kal raat maine ek sapna dekha,

Sapne mein dekha ek pyara bachcha

Hatho mein uske thi ek gudiya

Bade pyar se use tha wo puchkaarta

Phir na jane usko kya hua,

Gudiya ko usne phek diya,

Kaha, "Bahut hua ye khel"

Jaane kis baat ka usko gussa tha

Phir door ek kone mein baitha

Wo tooti gudiya ko dekhta

Kya kiya kyun kiya

Yeh sochkar rone lagta

Bematlab ki baat ko lekar

Apne pyari gudiya ko bhul gaya

Itna hi jab wo pyari thi
Phir kyun tu usse door gaya

Kuchh yaad mujhe bhi aya tab

Jab main bhi chhota bachcha tha

Apne pyari gudiya ko bhi

Main yun hi sataya karta tha

Par gudiya pyari rooth gayi

Aur mujhko rota chhor gayi

Apne sath wo chhoti gudiya

Mera pyara bachpan loot gayi

Sapne se baahar aakar maine

Sach se nata jod liya

 Bas aaj ke din se maine

Gudiya se khelna chhor diya

Jatin H K Sharma